عايزة اتجوز

الحملة القومية...من حـــبة رخــامة

(اتجوزى ياننوسة قبل ما يجيلك قطر العنوسة)

حسب الاحصائيات تسعة ملايين شاب وفتاة عانس في مصر و 264 ألف حالة طلاق سنويا ،

يبقى البنات تعمل ايه ؟؟؟


. لازم تتصرفى بسرعه انتى وهى ، لازم تتعلمى توقعى الشباب فى دباديبك ، والشباب جاهزين جدا ومستعدين بس انتى شاورى ، وسيبك بقى من اللى يقولك اهم حاجه فى البنت اخلاقها والاصل الطيب ،

لان لو حد مشى على الكلام ده يبقى مفيش ولا بنت هتتجوز ( لا مؤاخذه يعنى ) 

، مش عارفه تعملى ايه ؟؟ حــبة رخــامة هتقولك على الحل:

1- هاتى ورقه وقلم واكتبى اسامى كل الشباب اللى مش متجوزين معاكى فى الشغل

( وادى الورقة والقلم هديا من الموقع)

اعملى دراسة جدوى وشوفى مين فيهم ينفع وحاولى ترمى شباكك عليه .

2- الشباب بيموتوا فى الدلع ( بهاء سلطان : الواد قلبه بيوجعوا وعاوز حد يدلعوا ) 

يبقى الشاب اللى عليه العين الصبح ترمى عليه السلام بصوت ناعم وكله دلع 

( سباح الخير .. قوليها بالسين بلاش بالصاد دليل على الرقه والدلع)

3- الشباب يموتوا فى المظاهر والبنت الستايل ،

يعنى تلبسى ع الموضه ولو معرفتيش تلبسى ازاى افتحى القنوات الفضائيه 

وشوفى اي مذيعه هتلاقيها سوووو ستايل ... قلديها

4- مفيش مانع من كلمتين انجليزى وسط كلامك عشان يعرف انك بنت كلاس يعنى بلاش حاضر وطيب قولى اوكى ، بلاش تقولى يالهوى ( قولى اوه ماى جاد) . وقوليلوا يا بيبى الكلمه دى بتهز كيان الشاب خالص !!!

5- اتبعى نظرية شاديه فى مسرحية ريا وسكينه (( اغريه يا سكيننه )) وده من اقوى الاسلحه اللى ممكن توقعيه بيها مانتى عارفه الشباب بيضعفوا بسرعه .

6- الشباب يموتوا فى البنت الرقيقه الحساسه (( اقلبيها نكد وكل كلمه دمعى دمعتين)) واستخدمى مناديل فلورا عشان ناعمه وقويه وكلها حنيه ..
وياسلام بقى لو حصل اى موقف صعب قدامك يغمى عليكى وهويحاول يفوقك استعبطى وخليه يقلق عليكى ويعرف قد ايه انتى رقيقه و مرهفه.

7- الشباب نقطة ضعفهم الماديات لما تتفتح مواضيه الجواز قدامك .. قولى ان اهم حاجه يكون فى تفاهم والماديات دى امش مهمه خالص كل شىء ممكن ييجى بعد الجواز واحد واحده .... ساعتها هو هيقدرك اوى وهيحترم تفكيرك.

8- الشاب يحب اللى ينفخ فيه وينافقه ... طول مانتى قاعده كلى عقله بكلمتين .. قوليله طول مانت قاعد فى المكتب بكون حاسه بالامان لما بتغيب يوم ومتجيش الشغل كله بيقف و المكتب بيبقى مضلم .. هتلاقيه كده اتنفخ فى قعدته وقرب ينفجر
( كـده تفـهمى انـك اكـلـتى عـقله )

9- لو انتى مش حلوه اوعى تقلقى ، شوفى واحده صاحبتك تكون حلوه والزقيلها روحى معاها كل مكان هتلاقى الشباب كلهم بيحوموا حواليها ( مـن جاور السعـيد يـسعد )
يمكن شاب يقع فى غرامك ومراية الحب عميا زى مانتى عارفه

10- رغم كل شقاوتك ومغامراتك العاطفيه اوعى تحكى له عن اى حاجه منها فهميه دايما انه اول واحد فى حياتك وهو الاول والاخير .
( و اهو كله بيطلع فى الغسيل )على راى الشاعر هدهد
 


11- لما يتصل بيكى اوعى تردى عليه من اول اتصال ، سبيه يرن شويه عشان يعرف قيمتك لازم تتقلى .

12- لو امه لسه عايشه اعصرى على نفسك لمونه وقوليلها يا ماما اوعى تقوليلها
يا طنط 
(لان الامهات مسيطره ع الشباب تماما الايام دى عايزه تكسبى الشاب اكسبى امه الاول ، ابقى قابلينى لو عرفتى )

13- اضحكى عليه وقوليله انك تعبتى من كتر المعاكسات فى الشارع وفى التليفون عشان يعرف ان معجبينك كتير وهو هيرو عشان قدر يفوز بيكى .

14- اوعى تندهيلوا باسمه لازم تبقى مختلفه اى اسم دلع يليق عليه 
( ميدو ، مودى ، مورا ،حماده ، صاصا ) 
ولو احتارتى خالص ومش لاقيه اسم دلع يناسبه قوليله يا (( بى بى)).

15- اعرضى عليه مميزاتك عرفيه انك شاطره فى الطبيخ حتى لو مبتعرفيش تسلقى بيض 
وفهميه انك بتساعدى مامتك فى شغل البيت حتى لو انتى جبتيلها شلل من عدم سماعك كلامها .

16- هزرى معاه و قوليله هات بطاقتك عشان اشوف صورتك والقطى تاريخ ميلاده ، ويوم عيد ميلاده هاتيله دبدوب و ورده على اساس انك رومانسية وقوليله 
( هابى بيرث داى ) 
بلاش تقولى (كل سنه وانت طيب) بالعربى احنا مفهمينه انك بنت كلاس اوعى تنسى .

18- لو عملتى كل اللى قولتلك عليه وفشلتى يبقى الواد ده مرتبط ومش عايز يقول او ممكن يكون مالوش فيها (الصراحه راحه على رأى مروه) ساعتها اوعى تيأسى ارجعى تانى لدراسة الجدوى اللى كنتى عملاها وشوفى غيره ماهم ماليين البلد .
-*-*-*-*-*-*-*-*-*-*-
 ----------------------------------------

انتظرى.الجزء الثانى..

(نصايح عمتك تباتة للمواقف المحتاجة)




--